Autoriteti i Aviacionit Civil i Republikës së Kosovës

Autoriteti i Aviacionit Civil i Republikës së Kosovës (AACK) është themeluar me Ligjin nr. 03/L-051 për Aviacionin Civil si agjenci e pavarur rregullatore për aviacionin civil. AACK-ja është përgjegjëse për rregullimin e sigurisë së aviacionit civil dhe rregullimin ekonomik të aeroporteve dhe shërbimeve të navigacionit ajror në Republikën e Kosovës. Aktivitetet në aviacionin civil në hapësirën ajrore të Kosovës zhvillohen në përputhje me dispozitat e Ligjit për Aviacionin Civil, Konventën për Aviacionin Civil Ndërkombëtar të datës 7 dhjetor 1944 dhe Marrëveshjen për Themelimin e Zonës së Përbashkët Evropiane të Aviacionit. Kosova posedon kornizën e duhur ligjore për aviacionin dhe mbikëqyrjen e aktiviteteve në aviacion. Vazhdimisht hartohen rregullore dhe kërkesa ligjore për të përputhur legjislacionin dhe procedurat e aviacionit të Kosovës me kërkesat ndërkombëtare, siç janë Standardet dhe Praktikat e Rekomanduara të Organizatës Ndërkombëtare të Aviacionit Civil dhe veçanërisht me kuadrin ligjor të BE-së si pjesë e detyrimeve tona sipas Marrëveshjes së Zonës së Përbashkët Evropiane të Aviacionit, në të cilën Kosova është palë kontraktuese.

Hartohen materiale udhëzuese si për industrinë ashtu edhe për personelin e AACK-së për të mundësuar të kuptuarit e lehtë dhe përmbushjen e kërkesave ligjore dhe standardeve. Implementimi i Sistemit të Menaxhimit të Sigurisë nga të gjithë operatorët, duke filluar nga aeroportet, kompanitë ajrore e deri te ofruesit e shërbimeve të trafikut ajror dhe organizatat e mirëmbajtjes, është themel për operacione të sigurta në aviacion. AACK-ja është e zotuar për arritjen e nivelit më të lartë të mundshëm të sigurisë në Kosovë. AACK-ja ka mandat për të detyruar përmbushjen e kërkesave ligjore dhe standardeve.